أحمد جوزى تصرفاته غريبه
وبستسلم وبقعد في أرضية الحفرة
وأنده عليه أقوله تعالى طلعني
لكن ما كانش بيرد
فببدأ أصرخ واستنجد بيه وأقوله مابتردش عليا ليه
فالاقيه بدأ يهيل عليا التراب جوا الحفرة
وبيظهر تلاته معاه تانيين وقتها ويبدأوا يهيلوا عليا التراب وانا بصرخ وبقول له
_ليه، انا عملت ايه، انا مش قادرة افتحه
لغاية ما كان يوصل التراب لراسي
فكنت بقوم من الحلم مخضوضة ومش لاقطة نفسي
وفضل الحلم يتكرر لغاية ما أحمد جالي في يوم وقال إنهم لقوا مدخل تاني للمقةةبرة غير مدخل البيارة لكن الشيخ قالهم إني لازم أكون معاهم عشان الحماية اللي معايا تحميهم فرديت عليه وانا مش مصدقة انه جاي يقولي حاجه زي كده
=انت بتقول ايه، انت مجنون، انا عمري ما هروح معاك مكان زي ده
_يا سلمى دي ملايين هتغير حياتنا للأبد وهيكون ليكي نصيب زي كل واحد فينا
احنا خلاص حفرنا ووصلنا باب نفق المقةةبرة
=انا استحاله اروح مكان زي ده،، واستحاله أفكر مجرد التفكير في كدا،، انت ايه،، لحقت تنسى اللي م١ت،، لحقت تنسى انت كنت عامل ازاي،، ولا الفلوس خلاص عميت عينيك وقلبك...
ساعتها وقف قدامي مش عارف يقول ايه لكن بعد شويه لقيته قال
_خلاص، اللي تشوفيه
وفضل ساكت كام يوم ظهرلي فيهم ندمه على مجرد كونه فكر يخدني معاه هناك
ورجعت معاملته معايا تتحسن
لدرجة انه في يوم لقيته جايب معاه أكلة كباب وكانزات وشيبسي وقال لي ان احنا هنتغدى ونخرج يفسحني كمان عشان يعتذرلي عن اللي حصل..
كنت أه عامله زي الهبله وفرحانه وبفكر هلبس إيه واحنا خارجين لكن كنت حاسه إن في حاجه غلط لغاية ما في نص الأكل حسيت إن راسي تقلت فسألته وانا لساني تقيل
انت عملت ايه؟
حطيتلي ايه في الأكل ولا البيبسي ده ؟؟
وقبل ما يرد الدنيا غيمت في عينيا
عشان لما افتحهم الاقي نفسي نايمه في أوضه في بيت مهجور مالهاش شبابيك
كنت سامعاهم من ورا الباب بيزعقوا مع بعض
كان أحمد بيقولهم
_إحنا ماتفقناش انها تكون قربان، انتوا قلتوا اجيبها بس عشان تحمينا
=وأديك شوفت جبناها معانا والباب بردو ماتفتحش، وحراس المقةةبرة لسه حافظينه ولما نزلت الحفرة وحضّرتهم طلبوها بالأسم تكون قربان...
وقتها كنت قاعده بسمعهم ورا الباب وكإن صاعقة ضربت دماغي
كإن نار بتغلي في جسمي وبعدها تلج بيبقى بين ضلوعي
خوف وفزع ورعب واحساس بالغدر
خاصة لما كملوا كلامهم وقال اللي كان واضح إنه الشيخ اللي معاهم
=سيبني أخدها معايا الحفرة تحت، ولو الباب اتفتح معايا في وجودها يبقى الخدمة اللي معاها دي خدمة أقوى مما نتخيل،، ويمكن عشان هي مغمى عليها في الأوضة ومقفول عليها بابها، فالخدمة بتاعتها مابتتحركش ولا بتحميها وتحمينا من الحراس،، ولما هتنزل معايا تحت هيتغير الوضع
